Монголчууддаа онлайнаар бизнес хийхэд нь туслах, интернет бизнесээр дэлхийд гарах мөрөөдөлтэй болчихов. Тэгээд үүнийг хэрхэн хийх талаар суралцан, туршиж үзэв, нэлээдгүй туршлага хуримтлуулав. Өөрийн хүү Батаа, найзын охин Цэлмүүнийг дасгалжуулахын зэрэгцээ онлайнаар бизнес хийх сургалт дасгалжуулалтын хөтөлбөрүүд бэлтгэсээр явна.

Дэлхий дээр маш олон хүмүүс хэдэн зуун сая дагагчтай болж, тэдний амьдралд эерэгээр нөлөөлөн, дижитал улс гүрнийг байгуулж байгааг хараад бид яагаад болохгүй гэж бодогдсон хэрэг л дээ. Нэгэн цагт дэлхийг эзэлж явсан Монголчууд дижитал эринд өөрийн эзэнт улсыг бүтээх нь хэцүү биш болжээ. Хүү маань фейсбүүк пейжээ 2019 онд нээгээд хамгийн эхний постондоо дараах өгүүлбэрийг бичсэн байна.

“Би дэлхийн хэмжээнд хүмүүст ухаарал өгч, тэдэнд нөлөөлөхийг хүсдэг, My Way of Life - энэ пейж хуудаснаас миний аялал хаа хүрэхийг хараарай” гэжээ.

Номын нэрний хувьд олон хувилбар байсан ч, хүүгийхээ мөрөөдлөөр нэрлэхээр шийдэв. Тун удахгүй хүүхдүүд маань 5 жилийн дараа 1 сая, 10 жилийн дараа 5 сая дагагчтай болох биз. Тиймээс номоо “Дижитал Гүрнийг Бүтээхүй” гэж нэрлэлээ. Хүний хүсэл тэмүүлэлд хязгаар үгүй ажээ, таалан болгоо. 

.

.

.

Саяхны нэг түүхийг хуваалцлаа.

2023 оны зун Монголдоо очоод хамаатныхаа бүсгүйтэй ярилцан суулаа. Бид 2 нэг оных, хар багын өвөр түрийдээ орсон найзууд байв, бас нас чaцуу үеэлүүд.

Мань хүн сайн хань, 2 сайхан охинтой. Хувийн бизнестэй, Зайсанд шинэ байранд нүүж орсон гэнэ. Америк Авсралид очиж амардаг гэнэ. Хоёулаа л хүссэн амьдралаа бүтээсэн гэдэг дээр санал нийлэв. Эргээд харсан чинь хүүхэд байхдаа мөрөөддөг байсан бүхнээ бүтээж.

Тэгээд 2-уулаа арай том юм мөрөөддөг байжээ. Тэгсэн бол үүнээс томыг хийх байж гээд инээлдэв. Биднийг бага байхад ингэж том мөрөөдөхийг заагаагүй байж. Идэх хоол, өмсөх хувцас, орох орон, унах унаатай бол гүйцээ.

Одоо би хүүдээ хэлдэг юм. Ээж нь 50 гарч байж том мөрөөдөлтэй амьдрах ёстойг ойлголоо. Миний хүү ээж шигээ 50 хүрч ойлгоод яахав. Одооноос эхлээд том мөрөөдөж амьдар, хүн мөрөөдөж чадвал түүнийгээ хийдэг юм байна, 50 насны босгон дээр энэ бүхнээ хийчихээд эргэж нэг хараад өөрөөрөө бахархаж амьдар гэж сургаад л сууж байна.

Залуусдаа хандаж хэлэхэд эртхэн бизнесээ эхлүүл, "Your network is your net worth - Таны танилын хүрээ бол таны цэвэр хөрөнгө".

Үнэ цэнийг бүтээ, өөрөө үнэ цэнэтэй бусдад хэрэгтэй байхын тулд өөрийгөө тасралтгүй хөгжүүл гэж хэлэх байна даа. Бизнес бол байнга өөрийгөө сорьж, хөгжиж байдаг, хамгийн ашигтай талбар шүү гэдгийг хэлье. Амжилт, залуусаа.

Зохиогч. Др Чагнаадоржийн ОЮУНЦЭНД

Website: www.oyuna-erica.com

Facebook Page: Online Business Mongolia