Barnes-ийн анхны ХҮСЭЛ түүний хувьд хичнээн их бодит үнэ цэнэтэй байсныг би мэдэхгүй. Түүний олсон хоёр, гурван сая доллар тийм ч ач холбогдолтой зүйл байсангүй, харин бидний мэддэг зарчмуудыг хэрэгжүүлснээр БИЕТ БУС БОДОЛ нь бодит болдгийг харуулсан нь гайхалтай.
Barnes шууд л агуу Edison-той түншлэх бодолтой байв! Тэр өөрийгөө БОЛОМЖ гэж бодож байсан. Түүнд ЮУ ХҮСЭЖ БАЙГААГАА МЭДЭХ ЧАДВАР, ТҮҮНИЙГ ХЭРЭГЖҮҮЛЖ БОДИТ болгох хүслээс өөр юу ч байгаагүй.
Түүнд эхлэх мөнгө ч байсангүй. Тэр маш бага боловсролтой байсан. Түүнд ямар ч танилын нөлөө байгаагүй. Гэхдээ түүнд санаачилга, итгэл, ялах хүсэл эрмэлзэл байсан. Эдгээр биет бус хүчнүүдээр тэр өөрийгөө бүх цаг үеийн хамгийн агуу зохион бүтээгчийн хамтрагч болгосон юм.
Өөр нэг тохиолдлыг авч үзье. Хайж байсан зүйлээсээ 3 пит зайд очоод түүнийгээ алдсан эрийн тухай. Энэ талаар маш олон баримтууд байдаг лдаа. Мань эр тавьсан зорилгоосоо 3 хан питийн зайд очоод бууж өгсөн байдаг.
АЛТНААС ГУРВАН ПИТ ЗАЙД
Бүтэлгүйтэх хамгийн нийтлэг шалтгаануудын нэг бол түр зуурын ялагдал хүлээх үед түүнийгээ хаях зуршил юм. Хүн бүр энэ алдаандаа гэмшдэг.
R. U. Darby –ийн авга ах нь алтны хайгуул ид өрнөж байхад "алтны халууралд" өртөн, баруун нутаг руу очиж БАЯЖСАН байна. Газар доороос ухаж авах алтнаас илүүтэйгээр хүний тархинаас гарах алт их гэдгийг тэр хэзээ ч сонсож байгаагүй ажээ. Тэрээр алт олзворлохоор шанагаа аван гарав. Явахад хэцүү байсан ч түүний алтанд шунах хүсэл нь маш тодорхой байлаа.
Хэдэн долоо хоног хүнд хөдөлмөрлөсний дараа тэрээр гялалзсан хүдрийг олжээ. Хүдрийг газрын гадарга дээр гаргах техник хэрэгсэл хэрэгтэй болов. Тэрбээр уурхайн амыг нам дарж, Мэрилэнд мужийн Уильямсбург дахь гэрлүүгээ буцав. Хамаатан садан болон цөөн хэдэн хөршдөө хэлэн ажлыг нь хаяулав. Мөнгөө нийлүүлээд шаардлагатай машин механизмыг ачуулсан байна. Авга, Darby хоёулаа уурхайд ажиллахаар буцаж ирэв.
Анхны машин дүүрэн хүдрээ олборлож, хайлуулах үйлдвэр рүү ачуулав. Ашиг орлого нь Колорадо дахь хамгийн баян уурхай болохыг батлав! Тэд цөөхөн хэдэн машинд ачуулсан хүдрээр өрөө дарсан байна. Дараа нь тэд маш их ашгийг олов.
Хүдрийг доош ухсаар байлаа! Darby, Авга ах нарын найдвар хэт өсчээ! Дараа нь ямар нэг зүйл болсон байна! Алтны хүдрийн судал алга болов! Тэд солонгын төгсгөлд ирсэн бөгөөд алтны судал одоо байхгүй болжээ! Тэд дахин судлыг олох гэж өрөмдсөөр цөхрөнгөө барав.
Эцэст нь бууж өгөхөөр шийдэв. Тэд техник хэрэгслийг хог ачдаг хүнд хэдэн зуун доллараар өгөөд галт тэргээр гэр рүүгээ буцжээ. Зарим "хог" ачдаг эрчүүд тэнэгдүү байдаг ч, энэ хүн тэр нь биш байв!
Тэрээр уурхайн инженерийг дуудаж, уурхайг харуулж жаахан тооцоо хийв. Эзэд нь "алдааны шугам" -ыг сайн мэддэггүй байснаас төсөл бүтэлгүйтжээ хэмээн инженер зөвлөв. Түүний тооцооллоос харахад судал нь Darby –ийн өрөмдлөгөө зогссон газраас 3 питийн зайд гарч ирэхээр байж. Алтны судал яг эндээс олдсон юм!
"Хог" ачдаг хүн бууж өгөхөөсөө өмнө шинжээчийн зөвлөгөө авахаар хангалттай мэдлэгтэй байсан тул уурхайгаас олон сая долларын хүдэр олзворложээ.
Машин механизмд зарцуулсан мөнгийг ихэнх нь тэр үед үнэхээрийн залуу байсан R. U. Darby, түүнд итгэсэн хамаатнууд, хөршүүдээс гарсан. Тэрээр үүнийг төлөхөд олон жилийг зарсан ч бүгдийг нь буцааж төлсөн юм.
Үүний дараа Ноён Darby ХҮСЭЛ нь алт болон хувирдгийг олж мэдсэнээр энэ алдагдлаа олон удаа нөхсөн байдаг. Тэрээр амь насны даатгал зарах бизнес эрхэлснийхээ дараа энэхүү нээлтийг хийжээ.
Алтнаас гурван питийн зайд зогсон асар их хөрөнгөө алдсанаа санаж, Darby энэ туршлагаа өөрийн сонгосон бизнесдээ ашигтайгаар эргүүлсэн байна. "Би алтнаас гурван питийн зайд бууж өгсөн, гэхдээ намайг даатгалаа борлуулах үед хүмүүс ҮГҮЙ гэж хэллээ гээд би хэзээ ч бууж өгөхгүй."
Darby жил бүр сая гаруй долларын амь насны даатгал зардаг тавь хүрэхгүй цөөн хүмүүсийн нэг нь болсон байна. Тэрээр алт олборлох бизнесд бууж өгсөнөөс олж авсан сургамжиндаа бат зогссон юм.
Аливаа хүний амьдралд амжилт гаргахаас өмнө түр зуурын ялагдал, магадгүй зарим нэг бүтэлгүйтэлтэй учрах нь гарцаагүй. Ялагдал ирэхэд хүний хийж чадах хамгийн амархан бөгөөд ложик зүйл бол бууж өгөх. Энэ бол ихэнх хүмүүсийн хийдэг зүйл.
Нэгдсэн улсын таван зуу гаруй амжилттай яваа эрчүүдийн хамгийн том амжилт нь ялагдал тэднийг гүйцэж түрүүлэх тэр цэгээс нэг алхмын урд явсныг зохиогч хэлжээ. Бүтэлгүйтэл бол ёжтой, зальтай мэдрэмжтэй, амжилтанд яг хүрэхийн өмнөхөн унагадаг.
Шаргуу тууштай байхыг харуулсан ТАВАН ЦЕНТИЙН ХИЧЭЭЛ
Ноён Darby алт олборлох бизнесийнхээ дараа тун удалгүй " University of Hard Knocks"-д эрдмийн зэрэг хамгаалсан бөгөөд түүнд "Үгүй" гэдэг нь үнэндээ үгүй гэсэн үг биш гэдгийг харах аз тохиосон юм.
Нэгэн үдэш тэр авга ахдаа хуучны тээрэмд улаан буудай нунтаглахад нь тусалж байв. Авга ах нь олон тооны өнгөт арьстнууд тариалан эрхэлдэг газар амьдарч, том ферм ажиллуулдаг байлаа. Хаалга алгуурхан онгойж, түрээслэгчийн жижигхэн өнгөт арьст охин орж ирээд хаалганы ойролцоо зогсов.
Авга ах толгойгоо өргөн хүүхдийг хараад "Чи юу хүсээв?" гэж асуулаа.
Охин "Миний ээжид тавин цент хэрэг болоод.." гэж хариулав. "Надад байхгүй ээ" гэж авга ах хэлээд "Одоо чи гэр лүүгээ яв" гэлээ.
"За эрхэмээ" гэж хүүхэд хариулав. Гэхдээ тэр хөдөлсөнгүй. Авга ах нь ажилтай байсан тул хүүхдэд хангалттай анхаарал хандуулсангүй. Тэр толгойгоо дахин өргөөд охиныг харж "Би чамайг гэр лүүгээ яв гэж хэлсэн шүү! Одоо яв, тэгэхгүй бол гаргаад шидчихнэ шүү" гэж хашгирав.
Бяцхан охин "За эрхэмээ" гэж хэлсэн ч нэг ч инч хөдөлсөнгүй. Авга ах тээрмийн бункерт юүлэх гэж байсан нэг шуудай үр тариагаа унагах шахан, торхтой саваа аваад нүүрэндээ уур хилэн цацруулан охин рүү зүглэлээ.
Darby амьсгаа даран хүлээв. Тэрбээр аллагын гэрч болох гэж байгаадаа итгэлтэй байлаа. Авга ахынхаа догшин ууртайг мэднэ. Нутгийн өнгөт арьст хүүхдүүд цагаан арьстнуудыг эсэргүүцэх ёсгүйг ч мэднэ.
Авга ах охины зогсож байсан газарт очиход охин нэг алхам урагш алхаад түүний нүд рүү эгцлэн хараад "МИНИЙ ЭЭЖИД ТАВИН ЦЕНТ ХЭРЭГТЭЙ БАЙНА!" гэж чанга дуугаар хашгирав.
Авга ах зогсоод түүн рүү нэг минут харсны дараа баррелийн савыг шалан дээр аажмаар буулгаад гараа халаасандаа хийгээд хагас доллар гаргаж түүнд өгөв.
Охин мөнгөө аваад хаалга руу аажуухан ухарч, дөнгөж саяхан байлдан дагуулсан хүнээсээ нүдээ ч салгасангүй гарлаа. Түүнийг явсны дараа авга ах хайрцган дээр суугаад арав гаран минутын турш цонхоор гадагш харав. Тэр саяхан болсон явдалд гайхширан тунгаан бодож байв.
Ноён Darby ч гэсэн нэг зүйлийг бодож байв. Энэ бол түүний амьдралдаа анх удаа өнгөт арьст хүүхэд насанд хүрсэн цагаан арьст хүнийг өөрийн эрхшээлд оруулахыг харсан явдал байлаа. Тэр үүнийг яаж хийсэн бэ? Авга ах догшин зангаа алдаж, хурга шиг дуулгавартай болоход юу хүргэв?
Энэ хүүхэд ямар гайхалтай хүчийг ашиглан, эзнээ давж гарав?
Энэ, мөн үүнтэй төстэй бусад асуултууд Darby-ийн толгойд эргэлдэж байсан ч тэрээр олон жилийн дараа надад энэ түүхийг ярих хүртэл хариултаа олоогүй байлаа.
Хачирхалтай нь, энэхүү ер бусын түүхийг авга ахынхаа хуучин тээрэм дээр зохиогчид ярьсан байдаг. Бас нэг хачирхалтай зүйл гэвэл би бараг 25 жилийг, бичиг үсэггүй, үл тоогдсон өнгөт арьст охин ухаалаг эрийг хэрхэн байлдан дагуулсан хүчийг судлахад зориулсан байлаа.
Хуучны тэр тээрэм дээр биднийг зогсож байхад ноён Darby ер бусын байлдан дагуулалт хийсэн энэхүү түүхийг яриад "Та үүнийг юу гэж бодож байна? Тэр охин ямар хүчийг ашиглан авга ахыг маань бүр мөсөн эзэмдэв? "
Энэ асуултын хариуг та номонд дурдсан зарчмуудаас олох болно. Хариулт нь бүрэн бий. Үүнийг уншигчид ойлгуулахын тулд хангалттай дэлгэрэнгүй мэдээлэл, зааврыг багтаасан бөгөөд энэ бяцхан охины санамсаргүй байдлаар ашигласан хүчийг өөртөө хэрэгжүүлээрэй.
Оюун санаандаа үүнийг хадгал, охиныг аврахад тусалсан хачирхалтай энэ хүчийг дараагийн бүлгээс та уншина уу. Мөн номын хаа нэгтээ таны хүлээж авах хүчийг хурдасгах санааг та олох болно, тэгээд үүнийг өөрийн тусын тулд ашигла, энэ бол татгалзахын аргагүй хүч юм.
Энэхүү хүчний талаархи ухаарлыг эхний бүлгээс авч магад эсвэл дараагийн бүлэгт таны оюун ухаанд бууж магадгүй. Энэ ганц санаа хэлбэрээр ирж магадгүй. Эсвэл төлөвлөгөө, зорилго агуулсан байж болно.
Дахин хэлэхэд энэ нь таныг бүтэлгүйтэл, ялагдлын туршлага дээр, ялагдлаар алдсан бүхнээ эргүүлэн олж авах сургамжийг танд авчирч болзошгүй юм.
Би ноён Darby бяцхан өнгөт арьст охины өөрөө ч мэдэлгүйгээр ашигладаг хүчийг дүрслэн хэлсний дараа тэрээр амь насны даатгалын борлуулагчаар ажиллаж байсан гучин жилийн туршлагаа ухраан санаж, энэ салбарт гаргасан түүний амжилтанд охиноос олж авсан сургамж багагүй нөлөөлсөн гэдгийг илэн далангүйгээр хүлээн зөвшөөрсөн билээ.
Ноён Darby: "Шинэ үйлчлүүлэгч худалдан авалт хийхгүй байх бүрт би тэр охины хуучин тээрэм дээр, том нүдээрээ ширтэн байхыг хардаг байлаа, тэгээд үүнийгээ заавал борлуулах болно гэж өөртөө хэлдэг байсан. Миний хийсэн бүх борлуулалтын талаас илүү нь тэдний "ҮГҮЙ" гэж хэлсний дараа хийгдсэн байдаг."
Тэрээр мөн алтнаас ердөө гуравхан метрийн зайд бууж өгсөн алдаагаа дурсан ярьсан бөгөөд "тэр" туршлага нь нүдээ олсон зүйл байжээ. Энэ надад хичнээн хэцүү байсан ч үргэлжлүүлэхийг зааж сургасан юм. Аливаа амжилтанд хүрэхээсээ өмнө сурах хэрэгтэй сургамж" гэжээ.
Ноён Darby ба түүний авга ах, өнгөт арьст охин, алтны уурхай зэрэг түүхүүдийг амь насны даатгал зарж амьдралаа залгуулдаг хэдэн зуун эрчүүд унших нь дамжиггүй. Darby-ийн амьдралд тохиолдсон эдгээр түүхүүд түүнийг жил бүр сая гаруй долларын амь насны даатгал борлуулах чадвартай нэгэн болгосон байна.
Амьдрал бол хачин, таахын аргагүй! Амжилт, бүтэлгүйтэл хоёулаа энгийн туршлагаас эхтэй. Ноён Darby-ийн түүх нийтлэг, хангалттай энгийн хэрнээ амьдралын хувь тавилангийнх нь хариултыг агуулсан чухал ач холбогдолтой үйл явдал байжээ.
Тэрээр эдгээр хоёр гайхалтай туршлагаас ихээхэн ашиг олжээ, учир нь тэр эдгээрийг шинжилж, тэдний заасан сургамжийг олж авсан юм. Гэхдээ амжилтанд хүргэж болзошгүй мэдлэгийг эрэлхийлж бүтэлгүйтлийг судлах цаг завгүй, хүсэл эрмэлзэлгүй хүний тухайд юуг хэлэх вэ? Тэрээр ялагдлыг гишгүүр болгон боломж руу хөрвүүлэх урлагийг хаанаас хэрхэн сурах вэ?
Эдгээр асуултын хариу болгон энэхүү номыг бичсэн билээ. Хариултуудыг арван гурван зарчмаар тайлбарласан бөгөөд унших явцад таны толгойд орж ирэх төлөвлөгөө, зорилго мөн амьдралын хачин зүйлүүдийн талаар эргэцүүлэн бодоход хүргэнэ.
Нэг оновчтой санаа гэдэг нь амжилтанд хүрэхэд шаардлагатай бүх зүйл юм. Энэ номонд дурдсан зарчмууд нь ашиг тустай санаануудыг бий болгох арга зам, аргуудын талаархи хамгийн сайн практикуудыг багтаасан.
Эдгээр зарчмыг тайлбарлахаас өмнө нэг чухал саналыг хэлэхийг хүслээ. . . . БАЯЛАГ ИРЭХЭЭ БОЛОХООР МАШ ХУРДАН ИРДЭГ, ТЭР ҮЕД ХҮН ЭНЭ БҮХЭН ЭНЭ ОЛОН ЖИЛИЙН ТУРШИД ХААНА БАЙСАН БАЙНАА гэж гайхдаг. Энэ гайхалтай үг шүү, хамгийн гол нь баялаг зөвхөн шаргуу, удаан ажилласан хүнд л ирдэг гэсэн түгээмэл итгэл үнэмшлийг бодолцоход хүргэдэг.
БАЯН ХҮН ШИГ БОДОЖ, ХӨГЖИЖ эхлэхээр баялаг бол оюун бодлоос, маш тодорхой зорилгоос, мөн шаргуу бус харин бага ажиллахаас ирдгийг ажиглах болно.
Та, бусад бүх хүмүүс баялагийг татах оюун бодлоо хэрхэн олж авахыг сонирхож байгаа байх. Би хорин таван жил судалгаа шинжилгээ хийж, 25000 гаруй хүнд анализ хийлээ, яагаад гэвэл би ч гэсэн "яаж ийм чинээлэг болдгийг" мэдэхийг хүссэн юм.
Энэ судалгаагүйгээр энэ номыг бичих боломжгүй байсан. Маш чухал үнэнийг эндээс анзаар, өөрөөр хэлбэл: Бизнесийн хямрал 1929 онд эхэлж, Ерөнхийлөгч Рузвельт үүрэгт ажилдаа орох хүртэл хамаг зүйл орвонгоороо эргэсэн байв.
Энэ хямрал хүмүүсийг хоосруулсан юм. Театрын цахилгаанчин гэрлийг аажим аажмаар асааж харанхуйг гэрэл болгон хувиргадаг шиг хүмүүсийн оюун санааны айдас аажмаар багасан итгэл болж хувирсан байдаг.
Энэ философийн зарчмуудыг эзэмшиж, хэрэгжүүлэх зааврыг дагаж эхэлмэгц таны санхүүгийн байдал сайжирч, таны хүрсэн бүхэн таны хөрөнгө болж хувирна.
Боломжгүй гэж үү? Огтхон ч үгүй!
Дундаж хүний нэг том сул тал бол "боломжгүй" гэсэн үгийг мэддэг. Тэр ажиллахгүй байх бүхий л дүрмийг мэддэг. Тэр хийж болохгүй бүх зүйлийг мэддэг.
Энэ ном нь бусдыг амжилтанд хүргэсэн дүрмийг эрэлхийлж, эдгээр дүрмийг дагаж мөрдөхөд бэлэн байгаа хүмүүст зориулагдсан юм.
Олон жилийн өмнө би нэг толь бичиг худалдаж авсан юм. Миний хамгийн түрүүнд хийсэн зүйл бол "боломжгүй" гэсэн үгийг хайчилж авсан. Энэ ч бас таны хувьд хийх ёстой ухаалаг зүйл байх болно.
АМЖИЛТЫН УХАМСАРТАЙ хүмүүс л амжилтанд хүрдэг. Өөрсдийгөө УХААНТАЙ болгох боломжийг үл тоомсорлож буй тэдгээр хүмүүст бүтэлгүйтэл ирдэг.
Энэхүү номын зорилго нь амжилтыг хайж буй бүх хүмүүст туслах, тэдний бүтэлгүйтлийн ухамсарыг амжилтын ухамсар болгон өөрчлөхөд сургах явдал юм.
Олон хүнд байдаг бас нэг сул тал бол бүх зүйлийг өөрийн итгэл үнэмшлээр хэмжих зуршил. Үүнийг уншиж буй зарим хүмүүс хэн ч БАЯН ХҮН ШИГ БОДОЖ, ХӨГЖИЖ чадахгүй гэдэгт итгэх болно. Бодлын зуршил нь ядуурал, гачигдал, зовлон, бүтэлгүйтэл, ялагдалд автсан тул тэд баялгийн талаар хэзээ ч бодож чадахгүй.
Эдгээр азгүй хүмүүс Америкт ирж, боловсрол эзэмшихээр ирсэн алдартай нэг хятадыг санагдуулдаг. Тэрээр Чикагогийн их сургуульд сурч байлаа. Нэгэн өдөр Ерөнхийлөгч Harper энэ дорноос ирсэн залуутай оюутны хотхонд уулзан, түүнтэй цөөн хором ярилцсан байна,
Америкийн ард түмний хамгийн тод ажиглагдам, танд сэтгэгдэл төрүүлсэн шинж чанар юу вэ гэж асуужээ.
"Өө" гэж хятад залуу дуу алдаад "Таны нүдний хазайлт. Нүд чинь хэлтгий юм!" гэжээ. Юу ч хэлэхэв дээ?
Бид ойлгохгүй байгаа зүйлдээ итгэхээс татгалздаг. Өөрсдийн хязгаарыг зөв хэмжүүр гэж тэнэгээр итгэдэг. Мэдээж, нөгөө нөхдийн нүд нь "хэлтгий" л байгаа, яагаад гэвэл тэд биднийхтэй адил биш.
Сая сая хүмүүс Henry Ford –ийн ололт амжилтыг хараад түүнд атаархдаг, түүнд аз тохиосон, эсвэл суут ухаантан, эсвэл Ford -ын хөрөнгийн үнэлгээнээс болсон гэж үздэг. Магадгүй зуун мянган хүнээс нэг нь л Ford -ын амжилтын нууцыг мэддэг байх, мэддэг хүмүүс нь энэ талаар ярихдаа хэт даруу, эсвэл хойрго байдаг биз, учир нь энэ их энгийн зүйл. Ганц л зүйл "нууц" -ыг төгс дүрслэн харуулдаг.
Нэлээд хэдэн жилийн өмнө Ford одоогийн алдарт V-8 мотороо үйлдвэрлэхээр шийджээ. Тэрээр найман цилиндрийг бүхэлд нь нэг блокоор цутгасан хөдөлгүүр болгон бүтээхээр хөдөлгүүрийнхээ загварыг гаргахыг инженерүүддээ даалгажээ.
Энэхүү загварыг цаасан дээр бүтээсэн хэдий ч инженерүүд найман цилиндртэй хийн хөдөлгүүрийн блокыг нэг хэсэг болгон цутгах боломжгүй гэдэг дээр санал нэгдлээ. Ford "Ямар ч байсан хий" гэж хэлэв.
"Гэхдээ, Энэ боломжгүй шдээ!" гэж тэд хариулав. "Үргэлжлүүл" гэж Ford тушаалаа, "Хичнээн их цаг хугацаа шаардсан ч хамаагүй амжилтанд хүртлээ ажлаа хий." гэжээ.
Инженерүүд урагш хөдлөв. Ford -ийн ажилчдад ажилдаа үлдэхийн тулд үүнийг хийхээс өөр арга зам байсангүй. Зургаан сар өнгөрч, юу ч болсонгүй. Дахиад зургаан сар өнгөрсөн ч юу ч болсонгүй. Инженерүүд захиалгыг биелүүлэхийн тулд төлөвлөсөн төлөвлөгөө болгоныг туршиж үзсэн боловч "боломжгүй!" гэдэг нь олйгомжтой байлаа.
Жилийн эцсээр Ford инженерүүдтэйгээ уулзахад түүний тушаалыг биелүүлэх ямар ч боломжгүй болсныг тэд дахин дуулгав. "Урагшаа яв" гэж Ford хэлэв, "Би үүнийг хүсч байна, би үүнийг авах болно." Тэд дахин ажилласнаар илбэдсэн мэт нууцыг олж мэдэв.
Ford –ийн ШАРГУУ ТУУШТАЙ байдал дахин нэг удаа хожлоо!
Энэ түүхийг минутын нарийвчлалтай дүрслээгүй ч түүний агуулгыг нь ойлгосон бизээ. Хэрэв та БАЯН ХҮН ШИГ БОДОЖ, ХӨГЖИХИЙГ хүсэж байгаа бол Ford-ийн саяыг олох энэхүү нууцаас бүү татгалзаарай. Та маш хол харах шаардлагагүй байх нь.
Henry Ford бол амжилтанд хүрэх зарчмуудыг ойлгож, хэрэгжүүлснээр амжилтанд хүрсэн хүн. Эдгээрийн нэг бол ХҮСЭЛ: хэн нэгэн юу хүсч байгаагаа мэдэх.
Ford - ийн түүхийг уншиж байхдаа түүний гайхалтай амжилтын нууцыг тодорхойлсон мөрүүдийг авч үлдээрэй. Хэрэв та үүнийг хийж чадвал, мөн Henry Ford-ийг баян болгосон тодорхой зарчмуудийг хэрэгжүүлж чадвал та түүнтэй адил амжилт гаргах болно.
ТА "ӨӨРИЙН ХУВЬ ТАВИЛАНГИЙН МАСТЕР, ӨӨРИЙН БОДЛЫН АХМАД НЬ" билээ...
Henley "Би хувь заяаныхаа эзэн, би оюун бодлынхоо ахмад нь" гэж бичсэн байдаг, бид өөрсдийн хувь заяаны эзэд, сүнснийхээ ахмадууд гэдгээ мэдэх ёстой, учир нь бидэнд бодлоо хянах хүч бий.
Тэрээр бидний хөдөлж, оршин тогтнодог энэ бяцхан дэлхий хөвж байдаг эфир, төсөөлшгүй өндөр чичиргээгээр хөдөлдөг энергийн хэлбэр бөгөөд эфир нь ертөнцийн хүчээр дүүрэн байдаг гэдгийг бидэнд хэлэх ёстой байсан юм. Бид оюун ухаандаа хадгалдаг бодлууддаа дасан зохицдог; мөн бидний бодлыг бодит болгон хувиргах байгалийн жам бидэнд нөлөөлдөг.
Хэрэв яруу найрагч бидэнд энэ агуу үнэнийг хэлсэн бол ЯАГААД бид өөрсдийн хувь заяаны эзэд, Сүнсний Ахмадууд болох тухай мэдэх байлаа. Энэ хүч нь хөнөөлт бодол, бүтээлч сэтгэлгээг ялгах гэж оролддоггүй харин баян хүн шиг үйлдэл хийхэд үр дүн нь хурдан гардаг шиг ядуу сэтгэлгээ ядуу байдлыг бодит болгодгийг хэлэх ёстой байсан юм.
Бидний тархинд давамгайлж байгаа бодлууд соронз болж, хэний ч мэдэхгүй арга замаар хүмүүс, нөхцөл байдлыг өөртөө татдаг гэдгийг тэр бидэнд бас хэлэх ёстой байсан юм.
Баялгийг асар их хэмжээгээр хуримтлуулахаасаа өмнө бид оюун ухаанаа баялгийн төлөөх ХҮСЭЛТЭЙ болгох ёстой ажээ. Мөнгөний төлөөх хүсэлтэй болох, ингэснээр"мөнгөний ухамсартай" болох ёстой гэдгийг тэр бидэнд хэлэх ёстой байсан юм.
Гэхдээ Henley гүн ухаантан биш, яруу найрагч байсны хувьд агуу үнэнийг яруу найргийн хэлбэрээр илэрхийлж, түүнийг дагаж явсан хүмүүс түүний шүлгийн гүн ухааны утга учрыг тайлбарлаг хэмээн үлдээв. Энэ номонд дурдсан зарчмууд нь бидний эдийн засгийн хувь заяагаа олж эзэмших нууцыг бага багаар нээх болно.
Одоо бид эдгээр зарчмын түрүүчээс нь судлахад бэлэн болсон. Нээлттэй сэтгэлгээгээр унш, эдгээрийг хэн ч бүтээгээгүй гэдгийг санаарай. Зарчмуудыг асар их хэмжээгээр баялаг хуримтлуулсан 500 гаруй эрчүүдийн амьдралын туршлагаас цуглуулсан билээ. Тэд ядуу зүдүү, боловсрол багатай, ямар ч нөлөөгүйгээр эхэлсэн юм.
Зарчмууд эдгээр хүмүүст тохирсон байв. Та тэдгээрийг өөрийн ашиг тусын тулд ажиллуулж болно. Хийхэд хэцүү биш хялбар. Дараагийн бүлгийг уншихаасаа өмнө эдгээр бодит мэдээллүүд энд дүрсэлсэн 2 хүний амьдралыг өөрчилсан шиг таны санхүүгийн хувьд очих газрыг амархан өөрчлөх болно гэдгийг мэдээсэй хэмээн хүслээ.
Эдгээр хоёр хүн болон бидний хоорондын харилцаа баримттай гэдгийг мэдээсэй хэмээн хүсч байна. Тэдний нэг нь миний хорин таван жил нөхөрлөсөн хамгийн дотны найз, нөгөө нь миний хүү. Энэ хоёр хүний ер бусын амжилтыг дараагийн бүлэгт тайлбарласан нь зарчмыг харуулах бөгөөд энэхүү зарчмын хүчийг онцлон тэмдэглэхийн оронд хувийн жишээгээр харуулахыг илүүд үзлээ.
Бараг арван таван жилийн өмнө би Баруун Виржиниа мужийн Салем коллежийн Төгсөлт дээр үг хэлсэн юм. Дараагийн бүлэгт тайлбарласан зарчмыг маш эрчтэйгээр онцолж хэлэхэд төгсөх ангийн нэг залуу үүнийг зүрх сэтгэлдээ хүлээн авч, өөрийн философийн нэг хэсэг болгосон байлаа.
Тэр залуу одоо Конгрессын гишүүн бөгөөд өнөөгийн засаг захиргааны чухал хүн болжээ. Энэ ном хэвлэгдэхээс өмнөхөн тэр надад нэгэн захидал ирүүлсэн бөгөөд энэ нь дараагийн бүлэгт дурдсан зарчмын талаарх санал бодлоо маш тодорхой илэрхийлсэн тул би түүний захидлыг энэ бүлгийн танилцуулга болгон хэвлүүлэхээр сонгосон юм. Энэ танд удахгүй ирэх онцгой зүйлийн талаарх санааг өгнө.
"Хүндэт Наполеон минь ээ:
"Конгрессын гишүүний хувьд, миний алба олон хүмүүсийн асуудлыг хариуцдаг учраас тэдний тусын тулд, эдгээр олон мянган хүмүүст тустай байж болох санал дэвшүүлэхээр үүнийг бичиж байна." Уучлаарай, би үүнийг эрт илэрхийлэх ёстой байсан, би таны үр ашигтай үйлчилгээ үзүүлэх агуу хайрыг мэддэг тул би саналаа хэлэхийг чин сэтгэлээсээ хүссэн болно.
1922 онд та намайг төгсөх ангийн нэг оюутан байхад Салем коллежийн төгсөлт дээр ирж үг хэлсэн. Тэр үед та олон түмэнд үйлчлэх ёстой тэрхүү боломжийг миний тархинд суулгасан билээ. Ирээдүйд тохиолдох ямар ч амжилт байсан энэ бол маш том хариуцлага гэдгийг ухааруулсан.
Салем коллежид хэлсэн үгэндээ Америкийн ард түмэн олон жилийн туршлага, хамтын ажиллагаагаар боломжуудыг бүтээн, агуу хүчээрээ Америкийг дэлхийн хамгийн баян үндэстэн болгосон гэдгийг миний оюун санаанд үлдээсэн бөгөөд эдгээр зүйлсийг нэгтгэн ном болгож байгааг олж мэдлээ.
Henry Ford нэг ч долларгүй, боловсролгүй, нөлөө бүхий найз нөхөдгүй хэрнээ гайхалтай өндөрт гарсан жишээг тайлбарласан чинь яг л өчигдөр мэт санагдаж байна. Би тэр үед таныг илтгэлээ дуусгаагүй байхад чинь би ямар ч хүнд хэцүү зүйл тохиолдсон ч тэр төвшинд очно гэж шийдсэн юм.
Мянга мянган залуучууд энэ жил, мөн дараагийн жилүүдэд сургуулиа төгсөх болно. Тэд бүгд миний таниас ирсэн урмын үг шиг урам зоригийг хайх болно. Тэд хаашаа явах, юу хийхээ, амьдралаа хэрхэн эхлүүлэхээ мэдэхийг хүсч буй.
Та тэдэнд хэлж чадна, яагаад гэвэл та маш олон хүний асуудлыг шийдвэрлэхэд тусалсан. Хэрэв танд ийм гайхалтай үйлчилгээг үзүүлэх боломж байгаа бол энэхүү номыг худалдан авагчид Хувийн Шинжилгээний Хүснэгтээ өгөхийг санал болгож байна, учир нь олон жилийн өмнө та надад хэлж байсан шиг амжилтанд юу саад болж байгааг тэдэнд харуулаасай хэмээн хүссэн юм.
Энэ үйлчилгээ таны номын уншигчдад тэдний алдаа дутагдал, ариун журмын талаар бүрэн дүүрэн, нэг талыг бариагүй зураглал өгөх ба тэдэнд амжилт ба бүтэлгүйтлийн ялгааг харуулах болно. Таны энэ үйлчилгээ үнэлэхийн аргагүй үнэ цэнэтэй билээ.
Сая сая хүмүүс сэтгэлийн хямралаас болж ихээхэн бэрхшээлтэй тулгарч байна. Эдгээр хүмүүс өөрсдийнхөө бэрхшээлийг мэдэж, таны санал болгох шийдлийг таатай хүлээж авах болно гэдэгт би өөрийн туршлагаараа мэдэж байна.
Бүх зүйлийг шинээр эхлэх шаардлага тулгардаг хүмүүсийн бэрхшээлийг та мэднэ. Өнөөдөр Америкт хэдэн мянган хүн санаагаа мөнгө болгон хувиргахын тулд эхнээс нь эхлэх ёстой, мөнгө санхүүгүй, зээлээ эргэн төлөхийг хүсч байгаа олон мянган хүмүүс байдаг. Хэрэв хэн нэгэн нь тэдэнд тусалж чадна гэвэл та л үүнийг чадна.
Хэрэв та номоо хэвлүүлбэл хэвлэлээс гарангуут нь таниар гарын үзэг зуруулан хамгийн түрүүнд авахыг хүсч байна.
Сайн сайхныг хүсье, надад итгээрэй,
Таныг хүндэтгэсэн,
"JENNINGS RANDOLPH"
Орчуулсан: Др. Чагнаадаржийн Оюунцэнд